Чаткал айыл аймагында жыл башынан бери бир топ иштер аткарылып, айыл аймактын жана райондун социалдык— экономикалык өнүгүүсүнө көрүнөөрлүк салымдар кошулууда. Төмөндө, айрым иш чараларга көңүл буруу менен, айыл аймакта аткарылган жана аткарылып жаткан жумуштарга токтоло кетсек ашыкча болбос.
Алсак, Курулуш айылындагы С. Мырзалиев орто мектеби быйыл республикалык бюджеттин эсебинен капиталдык ремонттон өткөрүлмөкчү. Буга чейин аталган мектептин чатыры жараксыз болуп калган болчу.
Быйыл, жакынкы мезгилдерде Чаткал районунун Курулуш айылынын жаңы конушуна зым карагай мамылары орнотулуп, электр жеткирилмекчи. Бул тууралуу Чаткал айыл аймагынын башчысы Нурланбек Мырзаяров билдирди. Анын маалымдашынча, айыл өкмөтү тарабынан бул иштерге жетиштүү акча каражаты бөлүнгөн.
Чаткал районунун Жаңы—Базар айылынын Жаңы—Кыштак участкасына мал жана жөө адамдар өтүүчү көпүрөнүн курулушу башталды. Баасы 3 млн, 473 миң сомду түзгөн бул көпүрөнүн курулуш иштери «Империя Групп»» ишканасы тарабынан жүргүзүлүүдө.
*****************************************
Чаткал районунун Ак—Таш айылында айылдык ишкер Сүйүтбек Исматов тарабынан зым тор токуучу жабдуу ишке берилди. Ишкер учурда өз айылын продукциясы менен камсыздап бүтүп, райондун башка айылдарына да сатууну максат кылууда.
**************************************
Чаткал районунун чек арага жакын жайгашкан Ак— Таш айылынын инфратүзүмүн өнүктүрүү максатында түнкү чырактарды орнотуу пландаштырылууда. Буга ылайык, Чаткал районунун өнүктүрүү фондуна 2 млн, 540 миң 525 сомдук долбоор даярдалууда. Аталган долбоор ишке ашып калса, аталган айылга 92 даана чырак жана буларды электр менен камсыздоого 1 даана трансформатор орнотулмакчы.
Чаткал районунун Чаткал айыл аймагы аталган айыл аймактагы аңчыларды колдоо максатында аңчыларга Аңчылык департаменти тарабынан берилген акчалай сыйлыктан тышкары айылдык кеңештин токтому менен жыйырма төрт миң сом акча каражатын бөлдү. Бул каражат жакында аңчыларга тапшырылмакчы. Белгилей кетсек, быйыл аңчылар он жети карышкырды тузакка түшүрүп, жок кылышкан.
******************************************
Чаткал районунун Чаткал айыл аймагы жергиликтүү калк арасындагы жакырчылыктын деңгээлин төмөндөтүү максатында Дүйнөлүк Азык Түлүк программасынын алкагында Айыл Кеңеш Кызматы менен биргеликте жардамга муктаж үй бүлөлөргө жаз, жай мезгилдерине ылайык утурумдук он эки күнөскана куруп берүүнү максат кылууда. Бул иштерге айыл аймагы тарабынан жүз элүү миң сом бөлүнгөн.
Быйыл, жакынкы мезгилдерде Чаткал айыл аймагынын Жаңы— Базар айылында жана Курулуш айылында эки бала бакча ачылып, элге кызмат көрсөтө баштады. Буга чейин аталган айылдарда бирден гана бала бакчалар иштеп келсе эми, бала бакчалардын саны төрткө жетти.
Чаткал районунун Жаңы— Базар айылындагы Ыдырыс— Ата тарыхый комплексинде «2016— жыл Тарых жана маданият жылына» карата бир топ иштер аткарылууда. Атап айтканда, жаз алды менен комплекстин айланасына КР. Айлана чөйрөнү коргоо агенттиги тарабынан берилген тянь— шань карагайынын үч жүз түп көчөтү тигилген. Бүгүнкү күндө, комплекстин айланасына брусчатка жаткыруу, мейманкананы оңдоо, күмбөзгө чыкчу жолдорду оңдоо боюнча долбоорлор ишке ашырылууда.Ал эми, комплекстин кызматкерлеринин баары медкароодон өткөрүлүп, туристтерди жогорку деңгээлде тейлөө боюнча курстан өтүшкөн.
Туристтик мезгил башталгандан бери бул туристтик жайга жүз кырк адам келип, диний жөрөлгөлөрдү жасап кетишкен. М. Эшназаров ]]>
