Маареке алгач маркумду эскерип, анын арбагына багыштап куран окуу менен башталып, андан соң, Сатыбалды Байдөөлөтовдун өмүр баяны менен тааныштырылды.
Андан соң, мектеп окуучулары Сатыбалды Байдөөлөтовго арналган ырлардан көркөм окушту.
Андан кийин, куттуктоо сөздөрүнө кезек берилип, алгач мектеп директору Шадыкан Айымбетов маарекенин катышуучуларын аталган маареке менен куттуктап, маркумдун эмгек жолуна учкай токтолуп, бул маареке «Тарых жана маданият» жылындагы бир маданий иш чара катары болуп калаарын белгиледи жана мектептеги жетишкендиктерге азыраак токтолуп өттү.
Кийинки куттуктоо сөзү район акими Канжарбек Эшалиевге берилип, ал өз сөзүндө Сатыбалды Байдөөлөтовду эскерүү маарекеси 
майрам катары сезүү керектигин айтып, маркумдун жогорку кызматтарда иштеген уулдарынын элге жасап жаткан эмгектери тууралуу учкай айтып, алардын баштарына ак калпак кийгизип, өтүп жаткан маареке менен куттуктады.
Чакан музыкалык тыныгуудан соң, райондук билим берүү бөлүмүнүн башчысы Тажибай Тынышов, Каныш-Кыя айыл аймагынын башчысынын орун басары Кубаныч Осмонбеквдор куттуктоо сөздөрүн сүйлөшүп, маркум тууралуу эскерүүлөрүн айтышып, маркумдун жубайы Зейнеп энеге ден соолук каалашты. 
Маарекенин жүрүшүндө маркумга арналган музейдин ачылышы болуп, катышуучуларды музей кызматкери Сатыбалды Байдөөлөтовдун эмгек жолу менен кеңири тааныштырды.
Маареке андан ары уланып, маркумдун уулу, чегара кызматынын полковниги Наркул Байдөөлөтов жана кызы, Эл агартуунун отличниги Касиет Байдөөлөтовалар сөз сүйлөшүп, 
катышуучуларга ыраазылык билдиришип, мектептин алдыңкы мугалимдерин баалуу белектер менен жана окуучуларын Сатыбалды Байдөөлөтовдун токсон жылдыгына арналган сертификат менен сыйлады.
Мындан сырткары, бир топ коноктор куттуктоолорду айтышты.
Маарекенин салтанаттуу бөлүгү аяктаган соң, Сатыбалды Байдөөлөтов тууралуу даректүү тасма катышуучулардын назарына сунушталды жана буга улай эле, маркумдун урматына волейбол оюну өтүп, жеңүүчүлөр акчалай байгелер менен сыйланышты.]]>
