2-май күнү район борбору Каныш-Кыя айылында кыргыз элинин улуттук оюндарынын бири- чикилдек атуу (чикит атуу) боюнча райондук мелдеш болду.
Жеке ишкер Талантбек Ботобековдун демөөрчүлүгү менен өткөн бул мелдешке район аймагынан жалпысы он эки команда катышып, күч сынашты.
Мелдеш өз ара кызуу жүрүп, Айгыр-Жал айылынан келген оюнчулар кызыктуу оюн көргөзө алышты.
Соңунда, калыстардын чечими менен 1-орун Айгыр-Жал-1 командасына ыйгарылып, 6000 сом акчалай байгени илип кетишти. 2-орунду ошол эле айылдын 1971-жылы туулган тургундарынан турган команда ээлеп, 4000 сом акчалай байгеге ээ болушту. 3-орунга Каныш-Кыя-3 командасы илинип, 2000 сом акчалай байгенин ээси болушту. Ал эми, 4-орунду Багыш айылынан келген команда алып, 1000 сом акчалай байге берилди. Мындан сырткары, мыкты оюн көрсөтүп, көрүүчүлөрдүн колдоосуна арзыган 3 оюнчу 200 сомдон акчалай сыйлыктар менен сыйланышты.
Жогоруда белгилегендей, мелдештин байге фонду жана жалпы катышуучулардын тамак-ашы жеке ишкер Талантбек Ботобеков тарабынан каржыланып, мелдешке жалпы элүү миң сом каражат жумшалды. -Мелдешти өткөрүүдөгү максатыбыз-кыргыз элибиздин улуттук оюндарын кайрадан жандантып, эл арасына алып чыгуу болуп саналат-дейт жеке ишкер Талантбек Ботобеков.
Айта кетчү нерсе, чикилдек атуу боюнча мелдештин өтмө кубогу 1-орунду алган Айгыр-Жал-1 командасына салтанаттуу түрдө тапшырылды. Эми, келерки жылда өтчү мелдешти өтмө кубокту алган Айгыр-Жал айылы өтмөкчү.]]>
