Коргон-Сай айылынын тушундагы Чаткал дарыясына курулган мал жана жөө адамдар өтүүчү көпүрө быйыл кеңейтилет. Бул тууралуу Коргон-Сай айылында болгон элдик жыйында район акими Канжарбек Эшалиев билдирди.
Анын билдиришинче, көпүрөнү кеңейтүү иши район аймагындагы кен казган фирма тарабынан жүргүзүлмөкчү.
Тактай кетсек, аталган көпүрөнү кеңейтүү коргон-сайлыктардын көптөн берки суроо-талаптарынын бири болуп келген.
Бүгүнкү күндө район боюнча 31 улан, кыздар район тарабынан жогорку медициналык окуу жайларында кен казган фирмалардын колдоосу менен окутулууда. Бул улан, кыздар окуу жайларын аяктаган соң, алдын ала келишим боюнча Чаткал районуна беш жыл иштеп беришет. Бул тууралуу район акими К. Эшалиев элдик жыйында маалымдады.
Чаткал районунун Жаңы-Базар айылына кен казуу менен алектенген «Консалитед Аурум» фирмасынын демөөрчүлүгү менен 13 млн. сомго 75 орундуу бала бакча курулууда. 
Бакчанын курулушу былтыр башталган. -Быйыл октябрь айына карата ишке кириши күтүлүүдө-дейт Чаткал айыл аймагынын башчысы Бакытбек Исабеков.
Айылда мындан башка дагы «Байчечекей» бала бакчасы бар. Аталган айылдын калкынын саны өсүп жаткандыктан, кошумча бала бакча ачуу зарылдыгы келип чыккан.
М.Эшназаров