«Кичи Чаарат» компаниясы ифтарлык иш чарасын өткөрдү

3-июнь күнү Чаткал районунда кен казуу тармагында иш жүргүзгөн «Кичи Чаарат» фирмасынын жетекчилиги район тургундарына ифтарлык өткөрдү.
Ифтарлыктын алдында бир топ тургундар фирманын жаңыдан ишке кирген кен талкалоочу фабрикасында болушуп, андагы шарттар менен жакындан таанышып, фабриканын модернизацияланып, автоматташтырылгандыгын өз көздөрү менен көрүшүп, андагы жумушчулар үчүн түзүлгөн мыкты шарттарга күбө болушуп, фирма жетекчилигине ыраазылык билдиришти.
Ифтарлыктын башында «Кичи Чаарат» фирмаларынын башкы директору Миау Жен Пин конокторду «Кош келиңиздер!» деп жылуу маанай менен тосуп алып, фирманы жергиликтүү калк менен биргеликте, ынтымак ырашкерлик менен иштетүү жана Чаткал району менен биргеликте илгерилөө жана өнүгүү негизги максаты экендигин айтты. «Кичи Чаарат» компаниясы бүгүнкү күнгө чейин жумушчуларга жалпы жетимиш млн. сом акча каражатын айлык маяна катары төлөп бере алды. Ал эми, соцфондго отуз млн. сом чегерген. Ар бир жылда мамлекетке ар кандай салыктын түрлөрү боюнча жалпы жыйырма млн. сом акча каражатын төлөп турмакчы. Бул көзгө көрүнөөрлүк аракеттерди жергиликтүү калк өз көздөрү менен көрүшүп, күбө бөлушмакчы. Мындан ары да жумушчулардын айлык маяналары өз убагынан кечиктирилбей төлөнүп турмакчы. Компания мындан ары кубаттуулукка кирип, жыл сайын жергиликтүү тургундардан төрт жүздөй адамды жумушка кабыл алууну көздөөдө.
Мындан сырткары, район акими Канжарбек Эшалиев, айыл аксакалдары Кадыр Эгембердиев, Атакан Ташбаев, Умар Абдыкеримов, Байызбек Балташевдер ифтарлык өткөрүп жаткан «Кичи Чаарат» фирмасына ыраазычылык билдиришип, фирма Чаткал районуна социалдык-экономикалык жана маданий жактан көрүнүктүү салым кошуп жаткандыгын жана буга район калкы ыраазы экендигин белгилешип, фирманын мындан аркы иштерине ийгиликтерди каалашты.
Ифтарлыкка жалпы жүз элүүгө жакын адам катышты. Ифтарлык учурунда компанияга буга чейин оң жана терс сын пикирлерин билдирип келген жарандар бир дасторкондун четине биригишип, баары бир ооздон компаниянын район калкына мындан ары пайда гана алып келген ишкана бөлүшуна тилектештиктерин билдирип жатышты.
Ифтарлык иш чаранын жүрүшүндө башкы директор Миау Жен Пин андагы тестиер кыз-балдарга бирден оюнчук мамалак белекке берди. Ал эми, иш чаранын соңунда ар бир конокко бирден кичинекей термостор белек катары таркатылды.
Кошумчалай кетсек, «Кичи Чаарат» фирмасы Чаткал районунун жергиликтүү калкы менен өз ара ынтымакта иштешүү максатында райондук деңгээлдеги спорттук маданий массалык иш чараларды өткөрүп, район калкын ар бир мааракеде куттуктап, калк арасындагы колдоого муктаж жарандарга материалдык жана финансылык колдоолорду берип келүүдө. Болуп өткөн ифтарлык иш чарасы да фирма менен жергиликтүү калкты ынтымакка чакырган иш чаралардын бири болуп, фирма жетекчилигинин жергиликтүү калктын каада-салттарын жана улуттук, диний өзгөчөлүктөрүн сыйлай тургандыктарын көрсөтө алды.

М. Эшназаров, журналист

Кулактандыруу!

Каныш-Кыя айыл аймагына караштуу Айгыр-Жал,Каныш-Кыя жана Башкы-Терек айылдарындагы комерциялык жерлерди сатуу үчүн аукцион өткөрүүнү жарыялайт. Аукцион 2019-жылдын 28-май күнү Каныш-Кыя айыл аймагынын имратында саат 14-00 дө өткөрүлөт.

Сурап билуу телефону (0772) 85-87-87.

«Вертекс Голд Компани» спорттук иш чараларды өткөрдү

27-28-апрель күндөрү район борбору Каныш-Кыя айылында район аймагында кен казуу иштерин жүргүзгөн «Вертекс Голд Компани» компаниясынын колдоосу менен спорттун футбол, волейбол жана ордо оюндары боюнча мелдештер өткөрүлдү.
Мелдештин биринчи күнүндө С. Байдөөлөтов орто мектебинин спорттук аянтчасында ордо оюну боюнча он команда ат салышып, оюн абдан кызуу жүргөндүктөн кечке дейре созулуп,, оюндун финалдык бөлүгү эртеси улантылды.
Ал эми, футбол боюнча райондук ✓46-кесиптик лицейдин спорттук аянтчасында жана Айгыр-Жал айылынын спорттук аянтчасында он алты команда ат салышты.
Жыйынтыгында, 1-орунду Жаңы-Базар-1 командасы жеңип алды. 2-орунду Жаңы-Базар-2 командасы ээледи. Ал эми, 3-4-орундар Каныш-Кыя-1 жана Каныш-Кыя-2 командаларына берилди. Бардык жеңүүчү командаларга акчалай сыйлыктар тапшырылды.
Эртеси, 28-апрелде Каныш-Кыя жана Айгыр-Жал айылдарында волейбол боюнча эркектер жана аялдар командалары катышкан мелдештер өттү.
Анда эркектерден турган жалпы 22 команда жана аялдардан турган 10 команда ич ара ат салышты.
Жыйынтыгында, аялдар арасында 1-орунду Башкы-Терек командасы ээледи. 2-орунга Исмаил уулу Матиш атындагы орто мектебинин командасы ээ болду. 3-орун Т. Жаналиев орто мектебинин командасына берилди. 4-орун А. Айымбетов мектебинин командасына ыйгарылды.
40 жаштан жогорку эркектер арасында мелдеште 1-орунду Каныш-Кыя -1 командасы жеңип алды. 2-орунду Башкы-Терек айылынын командасы ээледи. 3-орун Айгыр-Жал айылынын командасына ыйгарылды. 4-орун Ак-Таш айылынын командасына берилди.
Ал эми, 40 жашка чейинки эркектер арасында мелдеште 1-2-орундар Каныш-Кыя айыл аймагынын командасына ыйгарылды. 3-орун Жаңы-Базар айылынын командасына, 4-орун Каныш-Кыя айылынын командасына берилди.
Бул күнү ордо оюну боюнча мелдеш да аяктап, жыйынтыгында он команданын арасынан 1-орунду Айгыр-Жал командасы жеңип алды. 2-орунду Чакмак-Суу командасы ээледи. 3-орун Жер-Капчыгай командасына, 4-орун Коргон-Сай командасына берилди.
Бардык жеңүүчү командаларга акчалай байгелер берилди.
Спорттук оюндардын жүрүшүндө «Вертекс Голд Компани» компаниясынын райондогу өкүлү Алмазбек Эшикулов компания райондо спорттун түрлөрүн өнүктүрүүгө салым кошуу максатында жыл сайын каражат бөлүп келе жатканын, мындай саамалык мындан ары да уланаарын айтып, айрым тургундар спорттук иш чаранын максаты тууралуу одоно, терс пикирлерди билдирип жатышкандыгын айтты жана компаниянын райондогу спорттук иш чараларды өнүктүрүүгө кошуп жаткан салымын туура кабыл алып, мындан саясат жасабоого чакырды.

М. Эшназаров

Жарыя!

 

Чаткал районунун Терек-Сай айылдык аймагына караштуу Кызыл-Токой айылынын Агартуу көчөсүнүн чыгыш тарабында Касан-Сай суунун сол жээгинин Ала-Бука –МЖС автожолунун тундук тарабынан 1000м^2жер АЗС куруу үчүн аукционго коюлат.
Баштапкы баасы 100 сом.

Конкурс Чаткал районуна караштуу Терек-Сай айылдык аймагынын айыл өкмөтүнүн имаратында 2019-жылдын 29-Апрель кунү саат 10-00до өткөрүлөт.
Байланыш учун тел : +996778-48-17-57
+996556-07-08-57

Кен тармагындагы ачыктыкка жетишүү максатында

Апрель айынын башында КР. Президенти Сооронбай Жээнбеков КР. Коопсуздук кеңешинин жыйынында кен тармагындагы оң жана терс көрүнүштөргө кеңири токтолуп, аталган тармакта ачыктыкты жана мыйзамдуулукту орнотуу боюнча бир топ маселелерди алып чыккан эле.
Буга байланыштуу, 22-апрелде Чаткал районунун борбору Каныш-Кыя айылында жер алдындагы кен байлыктарды өндүрүү ишмердүүлүгүнө байланышкан тегерек стол болду.
Тегерек столго кен тармагына байланышкан райондук жана облустук мекеме башчылары, фирмалардын жетекчилери, айыл аймак башчылары жана айылдык кеңештердин депутаттары катышты.
Иш чарада алгач район акими Канжарбек Эшалиев кен казган фирмалардын райондогу ишмердүүлүгүнө байланыштуу баяндама жасады. Баяндамада белгиленгендей, тоо кен окуу жайларын бүтүргөн 41 улан кыздар жумуш таппай олтурушат
Булардын айрымдары окууну өздөрү бүтсө, айрымдарын фирмалар окуткан.
Ата мекендик өндүрүштү колдоо максатында райондо сүттү кайра иштетип, сүт азыктарын чыгарып Ет Гео, Кичи Чаарат, ЗААВ Чаарат, Вертекс Голд Компани фирмаларына өткөрүү боюнча раймамадминистрация тарабынан сунуштар жиберилген.
Аким фирмаларга жергиликтүү калкка ар кандай кырдаалдарда техникалык жактан көмөк көрсөтүп келе жаткандыгы үчүн ыраазычылык билдирди
Жалал-Абад облмамадминистрациянын бөлүм башчысы Ажымамат Исаев Чаткал районунда кен тармагы гана эмес, экологиялык жактан таза продукция өндүрүү боюнча да аракеттенүү керектигин айтып, ошондуктан, жергиликтүү калк мындан ары жашап кетүүсү үчүн экологиялык таза продукцияларды өндүрүүнү колго алуу керек деди.
Ал өз сөзүндө белгилегендей,, Чаткалу экологиялык жактан таза район болуп саналат. Башка райондордо эпизоотиялык абал абдан начар болууда.
Айрым фирмалардын лицензиялык ишмердүүлүгү бүтсө да, рекультивациялык иштери бүтө электиги коомчулуктун көңүлүн буруп, терс таасирин тийгизүүдө
Каныш-Кыя айыл аймагынын башчысы Нургазы Жолдошев рекультивациялык иштерди жасатууга айрым фирмалардын айыл өкмөттү тоотпостук кылууда-деди.
Район прокурору Насирдин Бообеков фирмаларды мыйзамды сыйлоого жана мыйзамдуу иш жүргүзүүгө чакырды.
КР. УКМКнын Аксы, Ала-Бука жана Чаткал райондору боюнча өкүлү Максат Шабыралиев ар кандай маселелерди көчөгө топтолуп, өз алдынча чечпей, ушундай тегерек столго жыйналып, укук талаасында чечүү керектигин, коомчулук фирмалардын иштешине каршы эместигин, аларды фирмалар кеткен соң жер кандай абалда калаары тынчсыздандыраарын айтып, ушундай форматтагы жолугушуулар мындан ары да болуп турса жакшы болмок экендигин кошумчалады.
Экотехинспекциянын Аксы, Ала-Бука жана Чаткал райондору боюнча өкүлү Алмаз Курманкулов мыйзамсыз иш жүргүзүп жаткан фирмалар менен иштешип, алардын мыйзамдуу иш жүргүзүүсүн камсыздоо боюнча тынымсыз аракеттер жүргүзүлөөрүн билдирип, фирмалар «жогору жактагы» ишенген адамдарына таянып иш жүргүзүү деген терс көрүнүштөр мындан ары болбостугун, кен фирмаларынын ишмердүүлүгү президенттин жеке көзөмөлүндө экендигин айтты
Чаарат ЗААВ дын өкүлү Давран Вахабов фирманын жетекчиси кен казуучу аймактагы арчаларды кыюу боюнча чечим чыкпай жаткандыгын айтып, экология кызматынын өкүлү бул боюнча жакынкы күндөрү чечилээрин билдирди.
Вертекс Голд компаниясынын башчысы Баялинов Айгыр-Жал көпүрөсү быйыл бүтөөрүн жана райондогу жергиликтүү өндүрүшчүлөрдү колдоого фирма даяр экенин билдирди.
Ал буга кошумча, фирмаларга жумушка алуучу жумушчуларды алдын ала коопсуздук эрежелерине окутуу боюнча борбор ачса жакшы болмоктугун айтты
Аким Канжарбек Эшалиев райондук кесиптик окуу жайда окуу борборун ачса болоорун айтты
Чаарат ЗААВ дын жетекчиси Давран Вахабов кымбат баадагы техника эч нерсе эмес, адам өмүрү баалуу, бизге адам өмүрүн кыйган учурлар керек эмес деди. Аким Канжарбек Эшалиев да жумушка кирүүнү каалагандар техникалык коопсуздук маселелерин окуп үйрөнүп келишсе өздөрүнө да, фирмага да тынч болмогун айтты.
Кичи Чаарат фирмасынын жетекчиси Ван Зун аким сунуш кылган кен тармагына окуган он беш жарандын резюмелерин алып, шартка жараша жумушка алууга аракет көрөрүн айтты.
Чаткал айыл аймагынын башчысы Бакыт Исабеков кен фирмаларынын жүк ташуучу оор техникалары айылдарды аралап өткөндө чектен тышкары чоң ылдамдыкта өтүп жаткандыгын айтып, ар кандай кырсыктардын алдын алуу үчүн фирма башчылары жүк ташуучу автоунаалардын айдоочуларына эскертүү берүү керектигин айтты.
Булардан тышкары, айрым фирмалар районго статистикалык отчетторун бербей келе жаткандыгы, фирмалар бош орундар боюнча миграция бөлүмү менен иштешүүсү солгун экендиги, фирмалар демөөрчүлүк каражаттарын кеч которуп, көп иштер кийинки жылдарда калып жаткандыгы айтылды.
Тегерек столдун столдун соңунда, фирмалардын жетекчилерине жергиликтүү калктан жумушчу алууну көбөйтүү, мүмкүн болушунча аз камсыз болгон үй-бүлөлүү кесипкөй жарандардан жумушка алууну колго алуу, фирмалар мыйзамда каралган салыктарды районго өз убагында толук төлөөсү, Вертекс Голд Компани фирмасынын Айгыр-Жал айылындагы көпүрөнү оңдоону тездетүүсүн жана ушул эле фирмада жумушчуларга эмгек акыны КР Эмгек кодексине ылайык төлөп берүү жагын, экотехинспекция кызматы менен КР өнөр жай агенттигинен тиешелүү салыктарды төлөбөй, рекультивациялык иштерди жасабай жүргөн фирмаларга чара көрүүнү сурануу сыяктуу суроо-талаптар айтылды.

М. Эшназаров

Жарыя!


Чаткал районунун Терек-Сай айылдык аймагына караштуу Кызыл-Токой айылынын Агартуу көчөсүнүн чыгыш тарабында Кассан-Сай суунун сол жээгинин Ала-Бука-МЖС жолунун түндүк тарабынан 600 м^2 жерди жеке ишкерлик кылуу максатында социалдык объект ( май куюучу жай) куруу үчүн аукционго коюлат.

Баштапкы баасы: 100 сом
Конкурс Чаткал районуна караштуу Терек-Сай айыл аймагынын айыл Өкмөтүнүнимаратында 2019-жылдын 15апрель күнү саат 10: 00 дө өткөрүлөт.

Байланыш телефону: 0778 48-17-57
0556 07-08-57

«Айыл Банк» китеп белек кылууда

«Айыл Банк» ААК тарабынан республиканын алыскы тоолуу райондорундагы мектептерине демөөрчүлүк иретинде жетишсиз окуу китептери берилүүдө.
Бүгүн «Айыл Банк» ААКунун Ала-Бука филиалынын башкаруучусу Алыбаев Сырдаш Бузурманкулович тарабынан Чаткал районунун Т. Жаналиев орто мектебинде мектеп мугалимдери жана окуучулардын катышуусунда жүз даана китеп салтанаттуу түрдө тапшырылды.
-«Айыл Банк» ААКунун Башкармалыгынын Төрагасы Акимов Мурат Кудайбергеновичке мектеп жамаатынын атынанчоң ыраазычылык билдиребиз. Бүгүнкү берилген китептер биздин мектепте абдан таңкыс болчу.-деп мектеп директору Айсулуу Маматова ыраазычылык билдирди.
Эскерте кетсек, 2017-жылы «Айыл Банк» ААК тарабынан ушул эле мектепке окуучулардын билим алуусуна көмөк катары 3 компьютер белек катары берилген эле.
Кошумчалай кетчү нерсе, «Айыл Банк» ААКнын өкүлү Сырдаш Алыбаев аталган мектепке демөөрчүлүк катары берилген китептерден сырткары, өз эсебинен «Манас» эпосунун атактуу манасчы Сагынбай Орозбаковдун вариантындагы төрт томдугун белек катары тапшырды.

Техникалар жазгы айдап себүү мезгилине карата даярдалууда

Район аймагында жазгы айдап себүү мезгилине карата айыл чарба техникаларын даярдоо кызуу жүрүүдө. Алсак, бүгүнкү күнгө карата район боюнча жалпы 95 даана трактордун 62 си оң абалга келтирилди. Жер айдоо мезгили башталганча тракторлорду толук калыбына келтирүү аракеттери көрүлүүдө. Ал эми, үрөн себүү сүйүү шаймандар азырынча 80 % га даяр жана жакынкы күндөрү толук даярдыкка келтирилет. Булардан тышкары, соко, мала жана чиркегич сыяктуу керектүү шаймандар да оңдолуп, түзөлүп, толукталууда.

Кошумчалай кетсек, өткөн жылы Каныш-Кыя жана Чаткал айыл аймактарында уюшулган МТСтердин айыл чарба техникалары райондун айыл чарба тармагынын алга жылуусуна бир топ өбөлгө болууда.

М. Эшназаров

Суугат каналдары оңдолот

Быйыл райондук суу чарба башкармалыгы тарабынан Арпа-Төктү, Аюу-Чачы жана Ак-Суу каналдары оңдолмокчу. Аталган каналдарды оңдоого республикадан үч млн. сом каражат бөлүнгөн.

Каналдарды оңдоо иштери кар кетээри менен башталмакчы.

Сүрөт сайттын архивинен алынды

Үрөн даярдоо кызуу жүрүүдө

Ал эми, райондогу дыйкан-фермерлердин талабына ылайык, КР. Айыл арба министрлигине керектүү урөндөргө билдирүү берилди.

Алдыдагы жазгы айдап себуу мезгилине карата раййонубузда кызуу даярдык жүрүүдө. Бүгүнкү күндө Каныш-Кыя айыл аймагында 20 тонна буудай жана 6 тонна арпа үрөнү бар. Мындан сырткары, Каныш-Кыя айыл аймагынын Жайыт комитетине республикалык коомдук үрөн фондунан 12 тонна 1-репродукциядагы «Гетман» сортундагы арпа үрөнү, 1 тонна 1-репродукциядагы эспарцеттин үрөнү, 400 кг беде үрөнү алынып келинди. Буга кошумча, жакынкы мезгилдерде 9 тонна аммофос жана 9 тонна амиак селитрасы келээри күтүлүүдө.