Быйыл Каны-Кыя айыл өкмөтү тарабынан айыл аймакка баш ийген мектеп жана бала бакчаларга жалпысы 53700 сомдук 1345 даана ар түрдүү гүлдөрдүн көчөттөрү берилди. Буга кошо эле 51 даана карагайдын, 290 даана мырза теректин жана 96 даана кайыңдын көчөттөрү берилип, бул көчөттөрдүн жалпы суммасы 56300 сомду түздү. Бул тууралуу Каныш-Кыя айыл өкмөтүнөн билдиришти.

М.Эшназаров

Апрель-май айларында болуп өткөн ишембиликтер учурунда Каныш-Кыя айылынан 120 тоннадан ашуун таштанды айылдан сырткары ташылып чыгарылды. Бул иштерге Каныш-Кыя айыл өкмөтүнөн 180 миң сомдой акча каражаты жумшалды. Бул тууралуу Каныш-Кыя айыл аймагынан билдиришти.

Таштанды тазалоо жана ташуу иштери Каныш-Кыя айыл өкмөтүнүн техникаларынын жардамы менен ишке ашырылды.

Айыл өкмөтүнөн билдиришинче, мындан ары айына 3-4 ирет айыл өкмөтүнүн алдындагы турак-жай, коммуналдык чарбасынын техникалары менен Каныш-Кыя айылынан таштандыларды жыйнап, сырткары чыгаруп турууну максат кылынууда.

М.Эшназаров

Чаткал өрөөнүнүн кире беришиндеги «Кыз-Булак» жүргүнчүлөрдүн эс алуу жайы жеке ишкер Мухамедалы Батырбеков тарабынан оңдолуп-түзөлүп жана кеңейтилип, жалпы коомчулук үчүн кошумча тамактанып, эс алуучу жайга айландырылууда.
Быйылкы «Аймактарды өнүктүрүү жылына» карата аталган жайды өнүктүрүү үчүн Чаткал айыл аймагы тарабынан жеке ишкер Мухамедалы Батырбековго бөлүнүп берилген. Бул тууралуу Чаткал айыл аймагынын башчысы Бакытбек Исабеков маалымдады.
Ал эми, жеке ишкер Мухамедалы Батырбековдун билдиришинче, бул эс алуучу жайга азырынча бир боз үй жана эки сөөрү орнотулууда. Эс алуучу жай толук ишке кирген соң, бир учурда жүздөн ашуун эс алуучуну тейлемекчи. -Бул жерге көбүнчө жаштар үйлөнүү үлпөтүн өткөрүп, жаратылыш койнунда эс алганы келишет. Эс алуучу жай ишке кирсе, алардын да ойдогудай эс алуусуна шарт түзүлөт- дейт жеке ишкер.
«Кыз-Булак» эс алуу жайы май айынын соңуна чейин пайдаланууга берилет.
Жеке ишкер мындан сырткары Жаңы-Базар айылындагы жеке менчик «Нурсауле» ресторанын ачып, 5 жылдан бери калктын маданий эс алуусун камсыздап келүүдө.

М. Эшназаров

Бүгүн, Башкы-Терек орто мектебинде Чаткал райондук билим берүү бөлүмүнүн усулдук кабинетинин планына ылайык, «Ачык эшиктер күнү» болду. Анын алкагында «Кырк миң жыл өтсө да эстен чыккыс, кыргыздын кырааны бар, аты-Чыңгыз» аттуу концерт тартууланды.
Анда улуу жазуучу Чыңгыз Айтматовдун чыгармаларына байланышкан ырлар, сахналаштырылган көрүнүштөр, мугалимдер тарабынан тартылган чакан фильм жана слайд шоу тартууланды.
Иш чарага 9 мектеп жана 6 бала бакчадан келген 34 мугалим катышты.
Соңунда, болуп өткөн иш чарага байланыштуу тегерек стол болду.

М. Эшназаров

Бүгүн, Чандалаш айылынын негизги суугат каналы болгон Төлөбаев атындагы каналы ашар жолу менен тазаланды.
Бул ишке жалпысынан жүзгө жакын тургундар катышып, каналдын жыртык-тешиктерин чым, топурак жана цемент менен жамашып, ичиндеги акыр-чикирлерин жана топтолгон кум, шагылдан тазалашты.
Канал тазалоого Чаткал айыл өкмөтү 600 кило цемент бөлүп берип, трактор менен кум, шагылды ташып, эксковатор менен толуп калган жерлерин тазалоо иштерин жүргүзүп берди. Буга кошо эле, ашарчылардын тамак-ашына бир баш кой берди.
Эскерте кетсек, Жаңы-Базар айылынын тургундарынын үлүш жерлеринин сексен пайызы Чандалаш өрөөнүндө жайгашып, суугат маалында Төлөбаев атындагы каналын пайдаланышат. Канал 1982-жылы курулган. Узундугу 9 чакырымды түзөт.

М. Эшназаров

Чаткал айыл аймагында жыл өткөн сайын буудай аянттарын кеңейтүү колго алынууда. Буга дыйканчылыкка жарамдуу,  суулуу жерлердин көбөйүшү себеп болууда. Мисалы, былтыр айыл аймак боюнча кырк гектар гана буудай себилсе, быйыл буудай аянты жалпы жетимиш гектарды түздү. Келерки жылы мындан да көбөйтүлмөкчү. -Быйыл айыл аймакка караштуу отуз гектар жерге буудай септик. Келерки жылдан буудай аянттарын дагы көбөйтүп, элди өзүбуз жогорку сорттогу керектүү үрөн менен камсыздоону максат кылуудабыз. Себеби, дыйкандарыбыз райондон сырткары алыс жактардан үрөн алдырышып, түшүм начар болгон жылдары аракеттери актабай калып, кыйынчылыкка туш болууда.-дейт Чаткал айыл аймагынын башчысы Бактыбек Исабеков

М.Эшназаров

Курулуш айылындагы С. Мырзалиев атындагы орто мектебин 1998-жылы аяктаган бүтүрүүчүлөр  Тастопиян мазарына чыкчу төтө жолго цементтен тепкич жасап беришти. Алар бул ишти мектепти аяктагандыгынын 20 жылдык мааракесине карата соопчулук иш катары жасашкандыгын билдиришти.

-Биз быйыл 20 жылдык мааракени өткөрүүнүн алкагында элге чай берип, же бир башкалар сыяктуу бөлөк жумуштарды деле жасасак болмок. Классташтар кеңешип олтуруп, элге пайдалуу жана көпкө чейин кызмат кылчу жумуш жасайлы деп, айыл мазарына барчу жолго тепкич куруп берүүнү чечтик-дейт уюштуруучулардын бири.

Тепкич куруу иштерине жалпысынан жүз миң сом акча каражаты жумшалды.

М. Эшназаров