Архив за месяц: Январь 2017

Кулактандыруу!

Урматтуу чаткалдык студент улан— кыздар!

Чаткал районунун кулуну, Ош шаарындагы “Чаткал коомунун” төрагасы, Ош шаардык кеңешинин депутаты Кубатбеков Идирис  Атантаевичтин демөөрчүлүгү менен “Жаркын келечекке багыт” коомдук жаштар бирикмеси тарабынан  Чаткал районунун чет өлкөлөрдө билим алып жаткан студенттер арасында стипендиялык сынак жарыяланат!

Сынактын максаты:

Чет өлкөлүк ЖОЖдорго өз күчү менен өтүп жана ийгиликтүү билим алып жаткан Чаткалдык студенттерди колдоо жана алардын артынан өсүп келе жаткан өспүрүмдөргө стимул берүү.

Стипендия тууралуу:

1. Чет өлкөдө окуп жаткан ар бир Чаткал районунун студенти катыша алышат.

2. Стипендиянын өлчөмү 20.000 (жыйырма миң) сом

Конкурстун талаптары:

1. Сынакка катышуучу сөзсүз түрдө Чаткал районунун тургуну болуусу шарт

2. Талап кылынган документтерди толук жана ирээттүү түрдө тапшыруусу керек

3. Байланыш каражаттарын так көрсөтүүсү талап кылынат.

4. Конкурска катышууну каалоочулар эң кеч болгондо документтерин 20-февралга чейин тапшыруусу зарыл.

Талап кылынуучу документтер:

1. Резюме. (классикалык)

2. Өмүр баян

3. Окуу жайынан окуп жаткандыгын тастыктоочу маалымкат

4. Окуусундагы жетишкендик китепчесинин көчүрмөсү (зачетка)

5. Окуу жайы, билим алып жаткан адистиги тууралуу маалымат

6. Окуу жайга кантип өткөндүгү тууралуу кыскача баяндама

7. Кошумча жетишкендиктери тууралуу маалымат

8. Байланыш каражаттарын сөзсүз түрдө көрсөтүү керек.

Жыйынтыктоо жана сыйлоо:

Стипендиялык сынакка жөнөтүлгөн документтерди демөөрчү Кубатбеков Идирис жана “Жаркын келечекке багыт” коомдук жаштар бирикмесинин өкүлдөрү карап чыгып эң мыктысын татыктуусун тандашат.

Жеңүүчү деп табылган катышуучу атайын  Бишкек шаарында өтүүчү “Чаткал кечесине” чакырылат жана ошол жактан тапшырылат. Эгер алыста болгонуна байланыштуу андай мүмкүнчүлүк болбосо ошол учурдагы шартка жараша байгеси эң коопсуз жол менен жеңүүчүнүн колуна жеткирилет.

Кулактандыруу!

Урматтуу чаткалдык студент улан— кыздар!

Кыргыз Республикасынын Улуттук илимдер академиясынын Түштүк бөлүмүнүн төрагасы, биология илимдеринин доктору, Академик Токторалиев Биймырза Айтиевичтин демилгесинин негизинде “Жаркын келечекке багыт” коомдук жаштар бирикмеси тарабынан чаткалдык студенттерди колдоо максатында иштелип чыккан

“АКАДЕМИК Б.А. ТОКТОРАЛИЕВДИН СТИПЕНДИЯСЫНА”  сынак жарыяланат!

Сынактын ЖОБОСУ:

Багыты жана максаты:

Стипендия илимий багытка жана жаратманчылыкка арналат. Чаткал районунун ар кайсы шаардагы ЖОЖдордо окуп жаткан жаштарынын арасынан илим тармагына кызыккан, илим, технология, маданият сыяктуу тармактарда жанылык киргизүүгө жетишкен жаштарды колдоо жана эмгектерин баалоо максатын көздөйт. Жогоруда белгиленген тармактарга жаңыдан аралашып баштаган жаштарыбызга көңүл буруп, мындан аркы ийгиликтерине стимул берүү азыркы учур талабы болуп саналат.

Негизги талаптары:

Стипендия тууралуу:

1. Академиктин стипендиясы  жалпы 15000 сомду түзүп, 2 кишиге бөлүнүп берилет.

2. Жеңүүчүлөр тапшырылган документтердин негизинде аныкталат.

 

Кайсы тармактын өкүлдөрү катыша алышат:

1. Илимий жааттын кайсыл гана тармагы болбосун изилдөө иштерин жүргүзгөн жана көрүнүктүү жыйынтыкка жетишкен;

2. Эл аралык конкурстардын катышуучусу. Өзүнүн жеке таланты б.а. жөндөмүнүн негизинде ийгилик жаратууга жетишкен;

3. Технология тармагында. Заманбап деп эсептелинген бул тармакта жанылык ( сенсация) жаратууга жетишкен. ( компьютердик программалар, ар кандай электрондук буюмдар);

4. Маданият тармагында. Эл арасына таралган чыгармалардын, кызыктуу китептердин авторлору, жазуучулар, акындар, ырчылар, актёрлор ж.б.

Катышуучуга болгон талаптар:

1. Конкурска азыркы учурда Республикабыздын ар кайсы аймактарында билим алып жаткан ЖОЖдордун студенттери катыша алышат.

2. Конкурсанттын жашы 25 жаштан ашбоосу шарт.

3. Резюме (классикалык)

4. Өмур баян

5. Мунөздөмө

6. Өзүнүн жетишкендиктери түүралуу баяндама жана аларды тастыктоочу документтер.

7. Катышуучу тарабынан жасалган эмгек тууралуу башка кишилердин көз караш, сын пикирлери жана ал иштин маанилүүлүгү

8. Кошумча маалыматтар

Жыйынтыктоо жана сыйлоо:

Конкурсантардын документтери Академик Токторалиев Биймырза Айтиевичтин катышуусунда каралып чыгып, жеңүүчүлөр аныкталат.  Жеңүүчүлөр сыйлыктарын Бишкек шаарында өтүүчү “Чаткал кечесинде” демөөрчүнүн өз колунан алышат.

 

Ветлаборатория учур талабына жооп бербейт

 

Бүгүнкү күндө, райондогу серологиялык текшерүүлөрдү жүргүзүү ветеринардык лабораториясынын учурдагы абалы талапка жооп бербейт. Лаборатория Ала-Бука райондор аралык лабораторияга баш ийип, мында эки кызматкер эмгектенет. Бирок тилекке каршы, аталган лабораторияда тиешелүү шарттар түзүлбөй, иш алып баруу үчүн тиешелүү каражаттар бөлүнбөй жаткан кези.  Бул тууралуу жакында райондук коллегияда айтылды.

М. Эшназаров

Өткөн жылда мал чарбасында өсүш болду

Өткөн 2016-жыл ичинде райондун мал чарбасында бир топ өсүштөр болду. Чаткал райондук статистика бөлүмүнүн маалыматына ылайык, 2017-жылдын 1-январына карата район боюнча мал жана үй канаттууларын каттоонун жыйынтыгы боюнча  кара мал 7744 башты түзүп,  2016-жылдын 1-январына салыштырмалуу 84 башка же 101,1 пайызга, кой-эчкилер 72225 башка же, 2016-жылдын 1-январына салыштырмалуу 1255 башка же 101,8 пайызга,  жылкылар 2928 баш 2016-жылдын 1-январына салыштырмалуу 60 башка же 102,1 пайызга,  канаттуулар 34728 башка же, 2016-жылдын 1-январына салыштырмалуу 353 башка же 101 пайызга өскөн.

М. Эшназаров

 

Каныш-Кыя айыл аймагынын башчылыгына шайлоо болду

бүгүн, 25-январда Чаткал районунун Каныш-Кыя айыл аймагынын башчысын шайлоо болду.  Шайлоонун жыйынтыгы менен  айыл аймагынын башчылыгына жалгыз талапкер-Нургазы Жолдошев Каныш-Кыя айылдык кеңешинин 21 депутатынын 100 пайыз добушуна ээ болуу менен Каныш-Кыя айыл аймагынын башчылыгына бир добуштан шайланды. Бул тууралуу Чаткал аймактык шайлоо комиссиясынын төрагасы Чаткалбек Койчукеев билдирди.

Эскерте кетсек, Нургазы Жолдошев буга чейин Чаткал токой чарбасынын директору кызматын аркалап келген.

Жаңы айыл аймак башчысынын мындан аркы иштерине ийгиликтерди каалайбыз.

Өткөн жылда чаткалдык 386 дыйкан-фермер кредит алып иштетишкен

Өткөн 2016-жыл ичинде Кыргыз Республикасынын Өкмөтү тарабынан айыл чарба тармагын колдоо максатында чаткалдык дыйкан  фермерлерге жеңилдетилген кредиттерди берүү боюнча айыл  банк тарабынан райондун мал чарбачылыгына багытталып, 386 дыйкан-фермерге 58 млн. 605 миң сом, талаачылыкка багытталып,  450 миң сом кредит берилген. РСК Банк тарабынан мал чарбасына багытталып, 106 фермерге 29 млн. 75 миң сом кредиттер дыйкан-фермерлерге берилген.

Айрым СПАлардын иши көңүл толтурбай келүүдө

Райондун аймагында Каныш-Кыя айыл аймагында суу пайдалануучулардын «Суу Каныш-Кыя», «Суу Ак-Көл» ассоциациясынын карамагында 59 км аралыкта чарбалар аралык каналдар бар. Өткөн 2016-жыл ичинде  «Суу Каныш-Кыя» СПА нын карамагындагы кытай арык каналына АРИС тарбынан 100 миң сом, Каныш-Кыя айыл аймагынын жергиликтүү бюджетинен  230 миң сом,  «Суу Ак-Көл»  СПА нын Кайың-Суу каналынын башкы курулмасына  АРИС тарабынан 237 миң сом долбоор аркылуу каржыланып, оңдоп-түзөө иштери жүргузүлгөн. Калган чарбалар аралык каналдар ремонттон өткөрүлбөй ашар жолу менен тазаланып келе жатат.

 

Ал эми, Чаткал айыл аймагы боюнча «Суу Миянкол» СПАнын азыркы убакка чейин жетекчиси жок, азыркы мезгилге чейин иштер жүргүзүлбөй, чарбалар аралык каналдардын абалы начарлап бара жатат.  Бул тууралуу жаңырган жылдын  январь айынын жыйырма үчүндө болуп өткөн райондук коллегияда айтылды.

М. Эшназаров

Пайдаланылбаган айдоо жер аянттары кыскарууда

Өткөн 2016-жылда райондо 2015-жылга салыштырмалуу пайдаланылбай калган айдоо калемпир талаасы 1жер аянттары 231 гектарга кыскарган.    Мында, пайдаланылбай калган жер аянттары 696 гектар болуп,   мунун ичинен Каныш-Кыя айыл аймагында  159 гектарга, Чаткал айыл аймагында  62 гектарга, Терек-Сай айыл аймагында  5 гектарга ал эми, Сумсар айыл аймагында 5 гектарга кыскарган.

Пайдаланылбай калган жер аянттары негизинен кайракы, таштак жана айылдан алыс жайгашкан жерлер болуп эсептелет. 2016-жылга карата пайдаланылбай калган жер аянттарын кыскартуу максатында  айыл аймак  башчылары тарабынан иш-чаралар иштелип чыгып,  кайракы, таштак жана барууга мүмкүн болбогон жер аянттарын чөп чабыктарга которуу менен кыскартууга жетишилди.

М. Эшназаров

Чаткал эли учак кырсыгынан жабыркагандарга кол сунууда

IMG_20170117_134946

16-январда Чүй облусунун Дача— Суу айлында учак кулап, бир нече жарандар каза болду. Бул кырсык республика калкын оор кайгыга салып, 17— январь өлкө боюнча Аза күтүү күнү деп жарыяланып, бул күнү жер— жерлерде туулар түшүрүлүп, оюн— зооктор токтотулуп, эл аза күтүүдө.

Бул оор окуяга Чаткал эли да жүрөгү канап, кырсыкка кептелген жарандарга кол сунууда. Тактап айтканда, раймамадминистацияда райондук жетекчилик тарабынан чукул жыйын өтүп, анда мекеме, ишканалар тарабынан бир күндүк эмгек акы жана жергиликтүү калктан ыктыярдуу түрдө жардам катары которуу чечими кабыл алынып, аталган жумушту көзөмөлдөө боюнча атайы райондук комиссия түзүлдү.

Кошумчалай кетчү нерсе, Каныш— Кыя айлынын тургуну Мавлюдбү Карабаева  учак кырсыгына кабылгандарга жардам иретинде өз эсебинен райондук комиссияга беш жүз сом тапшырды.

М. Эшназаров

Маданият үйүнүн кызматкерлери ыр, күлкү тартуулашты

13-январда Ч. Айтматов атындагы Чаткал райондук маданият үйүнүн өнөрпоздору Айгыр— Жал айылына жаңыдан курулуп, пайдаланууга берилген А. Мамадалиев атындагы маданият  үйүндө «Ыр, күлкүгө аралаш, көңүл ачкын замандаш » аттуу концерт тартуулашты.

Концертке «Чаткал периси— 2016 » сынагынын жеңүүчүсү Айзада Кадырбек кызы, Аксы, Ала—Бука жана Чаткал райондор аралык жаш өспүрүмдөр арасындагы «Тамашоу— 2016 «, райондук «Эл ичи— өнөр кенчи » кароо— сынагынын жеңүүчүлөрү болгон Чаткал курама тобу конок катары катышты.IMG_20170113_185031 IMG_20170113_192752 IMG_20170113_193548 IMG_20170113_210705 IMG_20170113_194801 IMG_20170113_200029 IMG_20170113_201504 IMG_20170113_212830 IMG_20170113_195257 IMG_20170113_205135 IMG_20170113_213605 IMG_20170113_214029Концерттин жүрүшүндө, фольклордук, эстрадалык чыгармалар, боорду эзген интермедиялар жана бийлер аткарылып, көрүүчүлөр тарабынан өзгөчө шаң менен кабыл алынды. 

Райондук маданият үйүнүн өткөн 2016-жыл ичиндеги аткарган иш— чараларынын жыйынтыктоочу иш чарасы катары уюштурулган концерт көрүүчүлөрдүн купулуна толуп, жогорку деңгээлде уюшкандыкта өттү.

М. Эшназаров, КР. Журналисттер кошуунунун мүчөсү