2018-жыл-Региондорду өнүктүрүү жылына арналган иш чаралардын алкагында Каныш-Кыя айыл аймагы тарабынан бир топ иш чаралар турмушка ашырылууда. Атай кетсек, жакында айыл аймагынын өздүк каражаттарынын эсебинен 3 мектепке-С. Байдөөлөтов орто мектебине 23,  Исмаил уулу Матиш орто мектебине 24, Башкы-Терек орто мектебине 24, ал эми Каныш-Кыя айыл аймагынын кеңсесине 7 даана видеокөзөмөл камералары орнотулду. Буга кошо эле,  коомдук тартипти көзөмөлдөп туруу максатында Чаткал РИИБи үчүн Каныш-Кыя айылынын борборуна 1 даана видеокөзөмөл камерасы коюлду. Жалпы 79 видеокөзөмөл камералары орнотулуп, бул жумуштарга Каныш-Кыя айыл аймагынын бюджетинен 426105 сом акча каражаты жумшалды.

М. Эшназаров

Жаңы-Базар айылындагы Таалай Бектурганов атындагы айылдык маданият үйү түрткү берүүчү гранттын эсебинен капиталдык оңдоп-түзөөдөн өтүүдө. Эскерте кетсек, аталган маданият үйү курулгандан бери айрым утурумдук оңдоолорду эсептебегенде, быйылкыдай оңдоп-түзөөдөн өтө элек. Бул иштерге жалпысынан 894600 сом каралып, мындан Чаткал айыл өкмөтүнүн эсебинен 230000 сом каралып, калган каражаттар түрткү берүүчү гранттан болууда. -Маданият үйү буга чейин отун, көмүр менен жылытылган. Быйыл электр буу казаны менен жылытууга өтмөкчү -дейт Чаткал айыл аймагынын башчысы Бакытбек Исабеков

М.Эшназаров

Чаткал районунун Жаңы-Базар айылына кен казуу менен алектенген «Консалитед Аурум» фирмасынын демөөрчүлүгү менен 13 млн. сомго 75 орундуу бала бакча курулууда. Бакчанын курулушу былтыр башталган. -Быйыл октябрь айына карата ишке кириши күтүлүүдө-дейт Чаткал айыл аймагынын башчысы Бакытбек Исабеков.
Айылда мындан башка дагы «Байчечекей» бала бакчасы бар. Аталган айылдын калкынын саны өсүп жаткандыктан, кошумча бала бакча ачуу зарылдыгы келип чыккан.

М.Эшназаров

«Вертекс Голд Компани » ЖЧКсы «Глобал Джамгыр Майнинг » ЖЧКсы менен биргеликте район борбору Каныш-Кыя айылында алдыда куруу пландаштырылып жаткан алтын ылгоочу фабриканын долбоору менен жергиликтүү калкты тааныштыруу иш чарасын өткөрүштү.
Иш чара учурунда быйылкы алдыңкы бүтүрүүчүлөргө аталган фирмалар тарабынан акчалай сыйлыктар берилди.
Ал эми, «Вертекс Голд Компани » ЖЧКсынын жетекчиси Абдыбакыт Баялинов, Глобал «Джамгыр Майнинг » ЖЧКсынын жетекчиси Николай Ермошкин жана мамлекеттик геологиялык агенттиги менен мамлекеттик теникалык көзөмөл агенттигинин өкүлдөрү катышуучулардын фабриканын курулушуна байланышкан бир нече суроолоруна жооп беришти.
Кечкисин Ч. Айтматов атындагы райондук маданият үйүндө айыл тургундарына «Вертекс Голд Компани » жана «Глобал Джамгыр Майнинг» ЖЧКларынын колдоосу менен КР. Маданияттын мыкты кызматкери, белгилүү ырчы жана обончу  Тотомидин Жолдошев жетектеген «Таалай элеси » эстрадалык тобунун жана белгилүү эстрада жылдыздарынын  концерти тартууланды.

М.Эшназаров

20-июнда Чаткалдан чыккан белгилүү педагог, СССРдин эл агартуусунун отличниги, маркум Жунусбек Бейшенбаевдин ысымы өзү жашаган көчөгө салтанаттуу түрдө ыйгарылды.

Салтанатка Каныш-Кыя айыл аймагынын башчысы Нургазы Жолдошев, райБББнын башчысы Тажибай Тынышов, билим берүү кызматкерлеринин райондук бирлигинин төрагасы Ызан Кудайбердиев, маркумдун кесиптештери, замандаштары, айылдаштары, уул-кыздары жана жакын туугандары катышты.

Алгач Каныш-Кыя айыл аймагынын башчысы Нургазы Жолдошев маркумдун эмгек жолу менен тааныштырды. Андан  соң катышуучуларга сөз берилип, алар маркумдун эмгегин баалап, ысмын түбөлүккө калытруу максатында көчөгө коюлуп жаткандыгына ыраазылыктарын билдиришти.

Чаткалдан чыккан белгилүү педагог, СССРдин эл агартуусунун отличниги, маркум Жунусбек Бейшенбаев 1927-жылы 1-сентябрда Айгыр Жал айылында төрөлгөн. 1960-жылы Ош мамлекеттик педагогикалык окуу жайын аяктаган. 54 жыл райондун агартуу тармагына өз эмгегин арнап, катардагы мугалимден мектеп директору, райБББнын инспектору кызматтарын аркалаган. Маркумдун эмгеги жогору бааланып, Каныш-Кя айылдык кеңеши тарабынан өзү жашаган көчөгө ысмын ыйгаруу чечими кабыл алынган.

М.Эшназаров

4-июнда раймамадминистрациянын буйругуна ылайык, Коргон-Сай айылында «Мен айылымды даңктаймын» аттуу кароо-сынак өткөрүлдү.
Кароо-сынакта айыл калкы күү, ыр, бийлерди, Ч. Айтматовдун чыгармаларынан үзүндүлөрдү аткарышып, кол өнөрчүлүк жана улуттук тамак-аш көргөзмөлөрүн уюштурушуп, айылдын социалдык-экономикалык жана маданий жетишкендиктерин көргөзүштү.

Мындай сынак буга чейин Чакмак-Суу жана Башкы-Терек айылдарында өткөн.

Сынак жыл соңуна чейин улантылып, жыл аягында жыйынтыгы чыгарылып, сынакка катышкан 12 айылдын жеңүүчүлөрү аныкталмакчы.

Эскерте кетсек, аталган иш чара КР.Президентинин жыл башында жарыяланган «Аймактарды өнүктүрүү жылынын» алкагында өткөрүлүүдө.

М.Эшназаров

1-июнь-Балдарды коргоонун Эл аралык күнүндө Каныш-Кыя айыл аймагы жана Чаткал райондук социалдык өнүгүү башкармалыгы менен биргеликте   «Балдар сүрөтү» аттуу сынак уюштурулуп, сынакка айыл аймакка караштуу 9 мектептин окуучулары сүрөттөрдү тартып келген сүрөттөрү менен катышты. Комиссиянын чечими менен сынактын жеңүчүлөрүнө айыл аймагы тарабынан 15 000 сом акча каражаты сыйлык катары ыйгарылды.

Андан сырткары ар бир бала бакчаларда майрамдык салтанаттар өткөрүлдү. «ЗААВ Чаарат» фирмасы тарабынан аз камсыз болгон үй-бүлөдөгү жана ден-соолугунан мүмкүнчүлүгү чектелүү 40 балага 20 000 сом акча каражаты таркатылды. Каныш-Кыя айыл аймагынын башчысы Н.Жолдошев, айылдык Кеңештин депутаттары Г.Рысбекова жана У.Каратаевдер дагы демөөрчүлүк көрсөтүп балдарды куттукташты.

М.Эшназаров

1-июнда КР. ЖК депутаты Азизбек Турсунбаев Сумсар айыл аймагында иш сапары менен болду. Ал алгач КР. Социалдык өнүктүрүү министрлиги тарабынан жиберилген коляскаларды майыптар-Насиров Сапарбекке жана Тыныбек кызы Айжамалга тапшырды.
Андан соң, В. И. Ленин атындагы жатак мектебинин абалы жана айылдык спорт клубу менен таанышты.
Андан кийин Азизбек Турсунбаев Сумсар айыл аймагынын калкы менен жолугушту.

Мында алгач Чаткал районунун акими Канжарбек Эшалиев Сумсар айыл аймагында аткарылып жаткан иштер менен кыскача тааныштырып, Шакафтар айылына таза суу жеткирүү жана Сумсар айылынын таза суу түтүктөрүн оңдоого аракеттер көрүлүп жаткандыгын билдирди.
А. Турсунбаев Алабука-Сумсар унаажолун оңдоо боюнча тиешелүү министрликке кайрылып, ишти тездетүүгө аракет көрөөрүн билдирди. Ал эми, Алабука-Сумсар унаажолу аркылуу каттап жаткан Бозумчактагы Казакмыс компаниясынын оор техникалары үчүн тараза коюу боюнча аракет көрүлөөрүн айтты.
Жолугушуунун жүрүшүндө республикадан 2-орунду алган Сумсар орто мектебинин окуучуларын окуткан Альмира Халитовага белек тапшырды.

М.Эшназаров